政情：高永文呻分子料理唔飽
食物及衞生局局長高永文一向鍾意家鄉潮州菜，尋日佢出席科學廚神挑戰比賽頒獎禮時，見到一班中學生炮製分子料理，諗到一段趣事。話說佢曾經喺一間知名餐廳食咗一味分子料理梅菜扣肉，既然係分子料理，當然係冇肉食啦，所以高永文笑稱，結果都唔飽肚。
鍾情家鄉潮州菜
參加烹飪比賽嘅都係初中學生，其中有學生炮製「分子料理四重奏」，用多款水果加入海藻等配料，製成類似三文魚籽、雞蛋黃等甜品。高永文對一個用杧果汁製成嘅雞蛋黃特別感興趣，大讚整得好似真蛋黃，仲邊食邊讚同學們嘅分子料理符合政府依家推廣低鹽低糖原則。
雖然同學們煮嘅菜式味道唔錯，但高永文始終最愛潮州菜。佢透露，平日得閒都會入廚煮番幾味，希望傳統菜式唔會因為冇人學而失傳。