政情：廠商會練兵 前高官助陣
兩年前，城中幾大商會興起請前高官做行政總裁，不過眨吓眼就有兩人離職，其中香港工業總會行政總裁蘇家碧，就被港鐵高薪挖角出任公司事務總監，今年九月正式離任。至於中華廠商聯合會（廠商會）行政總裁黃靜文（Adeline），亦決定喺下月約滿後不再續任，暫時未知有新去向。高官咁吃香，確係令商會又愛又恨。聽聞兩個商會都好頭痛，事關要喺短時間內請到高人坐鎮打理會務，又怕辛辛苦苦物色合適人選後，冇耐又被財力雄厚嘅大公司撬走，所以都幾無奈。
離任未夠兩年
我哋收到風，廠商會認為與其費神請人，長遠計應由內部晉升，近日決定先以短期合約方式，請番同屬退休高官嘅前行政總裁梁世華（Paul）做住先。
離任未夠兩年嘅阿Paul重返廠商會後嘅主要任務，就係要幫手訓練行政部門同事，以便將來直接由內部晉升行政總裁，唔使成日喺外面搵人空降。由於要同Adeline做到無縫交接，扣埋對方未放嘅假期，預計阿Paul六月初就會正式返工。
廠商會會長李秀恒（Eddy）證實上述安排，佢話過往廠商會請前高官做行政總裁，係要借助佢哋嘅行政管理能力，同埋與政府嘅良好關係，以作為商會與官方溝通橋樑。但隨住廠商會與政府溝通無間，唔少廠商會中人亦先後獲委任加入政府各諮詢委員會，所以現時行政總裁嘅主要任務反而更加注重內部管理及溝通。
自言「始料不及」
Eddy又話，雖然阿Paul享受緊悠閒嘅退休生活，但由於佢係廠商會少見嘅四朝元老，先後輔助洪克協、尹得勝、黃友嘉及施榮懷四位會長，所以係非常合適嘅人選，而阿Paul亦爽快應承。咁短期合約即係幾耐？Eddy話一年之內叫做短期，惟有關合約嘅具體細節仍待落實。
我哋問過阿Paul心情如何，佢形容重返廠商會係「始料不及」。由於佢同Eddy係相識廿幾年嘅老友，所以好樂意喺非常時期返去幫手。阿Paul又話，佢喺廠商會做過六年行政總裁，今次重返駕輕就熟，因此太太都支持佢嘅決定。至於退休享受人生，咪遲些少再歎過囉！