中環出更：何俊賢「高招」 掛寶牒
政改宣傳手法層出不窮，除咗靠高官微服落區，新界鄉紳都要借助新界傳統智慧，尋日一大班人齊集大埔林村，擲寶牒祈求政改一定得。但同通過政改唔同，擲寶牒都係靠好運，身高起碼一米九嘅漁農界立法會議員何俊賢（高佬賢）雖然擲中，但賴貓喺地下執多個寶牒直接掛上樹，唔使跳、唔使拋，夠晒慳水慳力。
德成局長推搪拒拋
高佬賢靠高大身形掛寶牒補中，而以署理政務司司長身份現身嘅民政事務局局長曾德成就相當錫身，唔肯上陣擲寶牒，推搪話擲寶牒係新界人傳統，交番畀主人家做就得喇！唔通佢擔心一旦膠桔寶牒擲唔中，政改通過就得個吉？
唔肯擲寶牒咁錫身，但曾德成就趁活動開始前簽名支持政改，「搶閘」做第一個參與撐政改簽名運動嘅高官。不過，曾德成接過職員嘅模擬選票時只係笑笑口，冇親手剔出心水人選行使投票權喎。佢話選票只係宣傳用，就算真係投票都要保密進行啦！
卓妮