中環出更：蔡伯勵講政改 將有圓滿結果
立法會即將表決政改方案，香港政制發展到咗關鍵時刻。著名堪輿學家蔡伯勵日前應邀開講，唔少政界人士都去捧場，包括民政事務局前局長何志平及香港大學專業進修學院院長李焯芬等人。席間大家好關心政改可唔可以通過，紛紛請大師指點迷津，何志平仲好肉緊追問下月廿四日及七月八日（即立法會本年度最後一日大會）係咪吉日，能否順利通過政改？
指方案表決日屬好日
蔡伯勵嘅講座主題係中國陰陽五行及堪輿嘅現代科學觀，仲教大家點樣解讀通勝。到咗提問環節，眾人似乎對政治問題興趣好高。蔡伯勵話，順應民意，政改通過嘅機會好大，仲暗示當局唔會好似去年咁，乜都放縱唔理。此時何志平突然舉手追問，七月八日係咪好日？政改會否通過？蔡答稱當日係好日，會有圓滿嘅結果。
但何志平仲唔滿意，再問六月廿四日係咪可以通過政改。李焯芬聽完笑佢話︰「你都唔係局長啦！」不過蔡伯勵有問必答，話嗰日都係好日，仲話喺好日通過政改，市民應該有好日子過。點解何志平咁緊張呢？佢笑稱政改同全港市民有關，自己當然關心，又話退休後好得閒，所以都會睇通勝行事。
觀塘區議會主席陳振彬都有到場，佢同蔡伯勵相識十幾年，每年都收到大師送嘅流年預測，但炒股票佢就唔會問卜喇，只會多行善，望有好運到。講講吓，佢自爆近月炒股大豐收，勁賺七位數字添！
卓妮