一醜未平一醜又起，香港郵政醜聞多多，早就見怪不怪，估唔到依家居然無賴到唔認帳，真係唔到你唔服。
係人都知，香港郵政管理不善，年年虧損，面臨窮途末路。喺公眾壓力之下，郵政聲稱要改革，仲豪擲四百幾萬元聘請洋顧問進行研究，點知研究報告出咗之後，佢哋唔止唔肯採納，仲話報告質素唔達標，之後就終止合約，留低一筆爛帳。
好明顯，所謂唔達標只係香港郵政嘅片面之詞，不妨聽吓顧問公司點講吖嗱。該公司負責人強調，研究報告指出香港郵政多個營運問題，包括過分依賴傳統郵遞服務、欠缺創新、郵費比其他國家高等，再唔改革就會面臨虧損。呢啲全部係事實，唔係無的放矢，點知香港郵政完全聽唔入耳，連顧問費都唔肯畀。唔怪得洋顧問狠批港府簡直係無法無天嘅「香蕉共和國」，即係好似中美洲及加勒比海嗰啲落後小國咁解。
話時話，港產官僚一向崇洋媚外，芝麻綠豆嘅小事都要請洋顧問研究，一啲都唔出奇，最匪夷所思嘅係，香港郵政打完齋唔要洋和尚，仲以保密為由，拒絕交代四百幾萬元顧問費究竟去咗邊，擺明有蠱惑喇。正如立法會議員話齋，香港郵政單方面指摘顧問公司研究質素欠佳，並中途終止合約，做法極唔尋常，由於涉及公帑，當局有必要向公眾交代。
正所謂，忠言逆耳，良藥苦口，香港郵政請得顧問公司做研究，無非都係想搵出問題，對症下藥啫。家陣一句「唔達標」就關人個關，證明所謂改革根本係呃鬼食豆腐。老實講吖，顧問報告建議香港郵政提供速遞、網上郵政以及物流等服務，以增加收入，完全冇講錯，如果當局肯從善如流，接納建議，就唔使年年虧蝕啦。
冰凍三尺，非一日之寒，香港郵政經營不善，年年蝕錢，早已唔係新聞咯。審計署五年前已經揭露郵政虧損嚴重，要求諗辦法解決，可惜郵政官僚左耳入，右耳出，情況一直冇改善。淨係過去兩個財政年度咋，香港郵政就蝕咗過億元，問你怕未。
除咗經營不善，香港郵政內部行政混亂，搞到頻頻「失信於民」。呢，舊年爆出涉嫌滋擾東方報業集團嘅混帳事件，香港郵政拖咗五個幾月，上個月話就話完成調查，但賴得就賴，唔止冇交代真相，甚至連道歉都冇句，簡直豈有此理！
都係古人講得啱，物必先腐而後蟲生。香港郵政內部腐爛，又點可能唔醜聞多多吖。計功夫茶話齋，郵政官僚得過且過，根本無心改革，與其浪費公帑請顧問公司研究，不如索性執咗佢好過啦！