政情：「唔再發動佔領」 戴耀廷又呃人？
由「佔領中環」發起人戴耀廷、陳健民同朱耀明發起嘅佔領行動，自去年十二月清場後已告一段落。但距離立法會就政改方案表決嘅日子愈嚟愈近，民間人權陣線召集人陳倩瑩就揚言，要喺立法會表決政改方案前夕發起大型群眾運動，號召十萬人集會反政改。若然成事，分分鐘變成另一場佔領行動。戴耀廷就話，佢已經完成咗歷史任務，唔會再發動佔領。
雖然佔領行動後泛民主派已經變成一盤散沙，係咪號召到十萬人上街，都係一個好大嘅疑問。不過戴耀廷咁講，無異為泛民潑一盆冷水。更重要嘅係，三子反口覆舌有前科，所以都唔能夠太早斷言真假，大家聽住先喇！
民陣揚言十萬人上街反政改
陳倩瑩日前揚言民陣會喺「七．一」前發起群眾運動，例如喺立法會審議政改方案期間舉行集會、遊行，甚至可能發動包圍行動，以向泛民、甚至建制派施加壓力。佢仲聲言到時會有十萬人參加，有機會引發另一場佔領行動。
去年發起佔領行動嘅戴耀廷接受電視台訪問時，表明唔會再發動佔領。佢話，佔領之後佢已經完成歷史任務，「佔中三子」會返番去以個人嘅身份爭取民主。佢又認為，如果泛民已經決定咗否決方案，再搞集會作用都只係表態，三子雖不會缺席，但就話「係咪我哋去號召？幫手號召作用有幾大？都唔肯定。」
一場佔領搞到泛民面臨四分五裂，戴耀廷都有唔少「功勞」。除咗接連有大學學生會退出學聯，令學聯面臨瓦解之外，另一佔領主角學民思潮喺運動中備受質疑，號召力已大不如前；加上泛民又要兼顧嚟緊嘅選舉，否決方案之外仲要佢哋參與更激進嘅行動，相信佢哋都要衡量後果，所以十萬人上街最後可能只係一廂情願。
感「盛極必衰」 陳健民似後悔
另一邊廂，陳健民就話，諗起佔領行動啟動後三子「靠邊站」、改由學生主導，到依家學聯嘅退聯潮，佢最深嘅感受就係「盛極必衰」喎！唔知佢係咪後悔發起呢場令社會撕裂嘅運動呢？