香港最珍貴嘅資源係乜？唔使講大家都知，梗係土地喇。冇錯，香港地少人多，寸金尺土，土地資源零舍矜貴。但奇怪嘅係，港府作為最大地主，唔止冇好好珍惜土地資源，反而長期縱容非法霸佔官地嘅行為，搞到亂象叢生，投訴不斷。
呢嗱，申訴專員公署睇唔過眼，決定主動介入調查，審視地政總署針對非法佔用官地，以及違反地契條款個案嘅規範化制度係咪有改善之處，確保政府土地得到善用。公署係咁講嘅，按照現時一般做法，土地佔用人及違契業權人可向地政總署申請短期租約及修改地契條款，將違規情況規範化，可惜地政總署處理申請慢條斯理，好多個案超過一年都未完成，加上署方喺處理申請期間暫緩執法，令違規情況持續，對附近居民造成極大滋擾。
其實，非法佔用官地早就唔係新聞，審計署三年前曾發表報告炮轟地政總署執法不力，指當局接獲嘅個案不斷增加，每年達到八千幾宗，但就闊佬懶理，唔少個案拖延超過十年，最離譜嘅一宗拖咗十八年都未解決，成為名副其實嘅「跨世紀個案」。其後立法會政府帳目委員會亦發表報告，對地政總署表示「強烈不滿」及「失望」。
可惜吖，你有你強烈不滿，佢有佢繼續卸責，近年非法佔用官地嘅情況進一步惡化，當局嘅檢控數字反而大幅下跌，證明地政官僚得過且過，完全當審計署及立法會冇到。今次輪到申訴專員公署主動調查，結果係點，估都估到喇。
正所謂，其身不正，何以正人。有退休地政官員涉嫌霸佔元朗攸潭美一幅官地，作為出租場地用途，事件被本報踢爆之後，地政總署至聲稱會不偏不倚執法喎，你信唔信吖？嗱，當年市民投訴沙田有村屋霸佔官地，地政人員多次上門仍解決唔到，最後索性向違規者發出短期租約，將非法變成合法，簡直匪夷所思。所以話，旨意地政官僚執法，蚊都瞓蛇都死喇。
當然喇，非法佔用官地禁之不絕，地政總署執法不力固然難辭其咎，而刑罰太輕亦係主要原因之一。根據近年嘅案例，違例者最高罰款只係區區一萬元，唔止冇任何阻嚇力，根本就係變相縱容。唔講唔知，呢個罰則已經係四十幾年前定下嘅水平，咁多年都冇修改過，問你服未。
講到底，人嘅因素第一。如果地政總署唔改變敷衍塞責嘅官僚陋習，無論點樣修改法例提高刑罰，或者審計署同申訴專員公署點樣介入調查，都係嘥氣嘅咋！