政情：莫樹錦媽咪代子領獎 好開心
母親節就嚟到，唔知大家會送咩禮物畀媽媽呢？尋日國家教育部高等學校科學研究優秀成果獎（科學技術）舉行頒獎禮，肺癌權威醫生莫樹錦亦榜上有名。不過佢冇親自嚟領獎，而係由佢媽媽何奕姒代領。當莫媽媽上台領獎時候，全場報以熱烈掌聲，氹到老人家不知幾開心。對於莫媽媽嚟講，呢份可能係最好嘅母親節禮物喇！
當母親節禮物
我哋致電莫樹錦問清楚，佢笑稱自己唔喺香港，所以請八十幾歲嘅媽媽去領獎，佢話媽媽只係普通家庭主婦，佢咁做確係想畀媽媽開心吓，當母親節禮物喎！
中文大學校長沈祖堯嘅研究團隊亦憑「大腸癌發生分子機制、早期預警和防治研究」獲得自然科學獎一等獎。中大十幾年嚟一直致力研究大腸癌嘅發病機制同基因變異等，沈祖堯喺過去五年已經第四度獲獎，真係夠晒威。