政情：有相為證：鄉議局上台人選露玄機？

新界鄉議局於下月一日舉行埋正副主席選舉就完成換屆，預計除咗主席劉皇發（發叔）會繼續連任外，林偉強同張學明兩個副主席似乎未必坐得穩。鄉議局尋日舉行《基本法》二十五周年座談會，能夠坐上台嘅除咗嘉賓同正副主席三人，荃灣鄉事委員會主席鍾偉平都有份拍住發叔個仔劉業強上場，唔通鍾偉平今屆想捲土重來，翻兜再決戰林偉強？聽聞林偉強連任副主席後懶懶閒，更有鄉紳話佢「連幫發叔攞吓袋都懶」，主持會議嘅大事早已交晒畀發叔同張學明主理。至於張學明亦有鄉紳不滿佢同民建聯行得太埋，話唔定有人挑戰佢。副主席位會唔會大執位，相信好快就知道。