佔領運動結束之後，黃色及藍色就變得好敏感，唔少人經常將呢兩種顏色同政治立場畫上等號。尋日中電集團主席米高嘉道理就率領一眾高層見傳媒，佢梗要盛裝出席，仲打咗條疑似黃色領呔，唔通米高係暗示佢對政改嘅立場？
米高哈哈大笑解釋話，條呔其實係金色，雖然中電的確沿用黃色做代表色四十幾年，但係佢對政改方案無立場，叫大家唔好諗多咗。米高見自己條呔咁搶眼，不忘講笑話，如果邊個想要，佢可以即刻除低送畀佢，因為佢仲有好多唔同顏色嘅呔喎！
