政情：公文袋變陣焗洛區選
要參選俗稱「超級區議會」嘅立法會區議會第二界別議席，前提喺年底區選取得民選區議員嘅入場券，加上十五名民選區議員提名，各黨派正沙盤推演布陣大混戰。最新消息係公民黨（公文袋）力推前立法會議員陳淑莊出戰超級議席不果後，計劃焗住派現任立法會議員陳家洛上陣。公文袋臨急抱佛腳變陣，衝擊超級議席嘅可能性都係危危乎，底因係陳家洛出戰區選並無必勝把握，即使勝出，公文袋亦未必手握足夠提名票，認真係內憂外患多多嘞！
二○一二年立法會選舉首次新增五席超級議席，泛民及建制派分別取得三席及兩席，前者為民主黨涂謹申、何俊仁及民協馮檢基，後者為民建聯李慧琼及工聯會陳婉嫻。政圈盛傳，陳婉嫻及何俊仁擬棄選明年立法會選舉，分別由資深議員王國興及「乳鴿」接棒；分屬溫和泛民嘅馮檢基則要與工聯會「小花」陳穎欣於深水埗麗閣選區惡鬥，一旦落敗更加無法保住超級入場券。由此可見，明年出戰超級議席嘅人選或面目全非。
黨少票有前科 勝出非易事
一直有意染指超級議席嘅公文袋，對超級議席出戰人選仍然十五十六，一來係陳淑莊於黨內明示暗示後，仍不願鬆口參加區選，幾乎鐵定明年會再戰港島區；二來係按人口分布推算，明年港島區料將減一席，即只餘下六席，公文袋要連取兩席機會好微，因此「雙陳」很大機會兩個只能活一個，估計陳家洛只能被邀請轉戰超級議席，所以佢第一步或係年底出戰南區海怡東選區。
之不過，陳家洛參加區選並無必勝把握，事關二○一一年立法區選，公文袋候選人郭榮鏗於海怡東只取得一千多票，勁輸畀獨立建制派。再者該黨區議員數目係「有限公司」，加上於一二年拒撐當時為黨員嘅南區區議員司馬文出戰超級議席，於超級議席零經驗嘅公文袋想由零開始，實屬不易。
建制博多一席 陳勇呼聲高
至於建制陣營方面，據聞佢哋目標係攞多一席，除了民建聯、工聯會各鎖定一席外，由新界社團聯會理事長陳勇衝擊第三席嘅呼聲最高。陳勇接受查詢時不置可否，強調會尊重有關方面最後決定安排。睇嚟新一輪大混戰似乎在所難免。