中環出更:阿Ann遇長毛鬥講「廢」話

政改爭議嘈嘈吵吵,議員辯論時都重咗火藥味。繼前日立法會小組開會有議員互駡「狗奴才」、「人渣」後,尋日政改小組開會時罵戰全面擴大,多位議員齊鬥講「金句」。民建聯蔣麗芸(阿Ann)以「廢燉」批評泛民,引起泛民激辯用字有冇錯,後來社民連梁國雄(長毛)同阿Ann喺走廊相遇,長毛糾正佢應該係「廢戥」至啱。政改未表決,立法會已經開始打舌戰,唔知第日會唔會郁手呢?

點寫點解 鬧足幾分鐘

其實事件導火線係工黨李卓人突然鬧民建聯鍾樹根係「政治奴才」,阿Ann就即刻以泛民全部都係「廢燉」來還擊,「廢燉」一出,眾人立即陷入五里霧中,李卓人仲同阿Ann激辯咗幾個回合。

後來有傳媒喺走廊問阿Ann「廢燉」點寫,佢答唔出,途經嘅長毛即刻企定嘲笑阿Ann連字都唔識解,其實應該係「廢戥」。聲大夾惡嘅阿Ann話,「廢燉」即係「廢嘅」咁解!長毛又串佢好似時下女仔,着住件衫有英文字但又唔知咩意思,兩人就咁鬧足幾分鐘。

星爺撐媽媽揀老婆

講起金句,又點少得金融界吳亮星(星爺)。星爺力撐行政會議成員陳智思落區時所講嘅「媽媽幫手揀老婆」論,佢仲話「媽媽同你揀埋老婆又點樣?過去幾千年都係咁啦!」即刻惹來全場嘩然。

成班議員由朝嘈到晚,會議臨結束前十幾分鐘,工黨何秀蘭突然要求響鐘點人數,搞到趕住收工嘅建制派議員好不滿,批評何秀蘭心理唔平衡、陰濕,最終喺冇流會情況下散場,結束鬧劇。

卓妮

第一手消息請下載on.cc東網iPhone/iPad/Android/Windows Phone Apps