【本報訊】行路開工遇冷血扑頭黨，花姐和琴姐在母親節前幾乎無命，均嚇破膽，琴姐稱：「每日都會行經嗰度，當時都冇異樣，好正常，仲喺度傾偈。」詎料兩匪突然從後襲擊，「第一下打阿花，我仲喺度諗：『嘩，咩事呀？』然後先知道係打劫。」她形容疑匪兇悍，「我擰轉面一睇，見個男人拎支嘢係咁揈，一路係咁推我哋埋牆，我眼鏡都甩埋。成件事發生得好快，佢哋（匪徒）着乜衫都睇唔到。」
琴姐憶述案發經過時猶有餘悸：「我即刻大嗌『救命呀！』阿花就驚到出唔到聲！」未幾即有休班警員從私家車落車追捕兩匪。她稱，事發位置車流多，料不到會有劫匪犯案。事件令她留下陰影，直言不會再走經上址，「我寧願搭車，畀多少少錢安全啲！」對於疑匪落網她感到安慰。
花姐表示：「打劫都打啲有錢嘅後生仔啦！」她稱當時嚇至失聲，「日日行嗰度，點知發生得咁突然，（劫案）都有五分鐘，一下子都唔知點。我嗰陣嗌唔到出聲！」她又指，案發位置途人甚多，兩人遇劫後，立即有兩名途人走至，「嗰度太多人行，冇諗到會發生呢件事」，而當時除了休班警追截犯人，亦有熱心的士司機停車查問：「你哋使唔使幫手呀？」
花姐的女兒表示，發生劫案後，會建議母親乘搭的士上班，並隨身帶備防狼器。她指匪徒扑頭行劫離譜，希望受到嚴懲。