議事堂上爛鬥爛 鑊鑊新鮮鑊鑊甘

呢，話口未完又嚟喇。尋日工務小組委員會討論啟德體育園區前期工程撥款申請，雖然獲得通過，但就引發議員罵戰，建制派同反對派互相指摘，粗言穢語，醜態百出。呢邊批評對方盲目支持工程項目，導致「超支又超支」，係「狗奴才」；嗰邊就指對方拉布阻撓工程，係「人渣」。「狗奴才」鬥「人渣」，雙方爛鬥爛，最後有人憤而離場抗議，會議幾乎腰斬咁滯。

姑勿論今次誰是誰非，堂堂議員出言粗鄙，已經有失體統，而將莊嚴嘅議事堂搞到烏煙瘴氣，更加令人忍無可忍。正如魯迅話齋，辱罵和恐嚇決不是戰鬥。議員之間有唔同意見本來好正常，我唔贊同你嘅意見，但我誓死捍衞你發表意見嘅權利，咁先至係民主吖嘛。可惜，呢班政客口講民主，而所作所為就同民主背道而馳，依家連「狗奴才」同「人渣」都出埋，下次唔知又有咩新發明呢？

正所謂，冰凍三尺，非一日之寒，立法會唔係今日至烏煙瘴氣嘅喇。部分政客譁眾取寵，一味做騷，爆粗、擲物、掃枱，無奇不有。尤其係佔領行動之後，反對派發起全面不合作運動，為反對而反對，拉布、流會成為常態，導致議會空轉，施政癱瘓，連民生議題都嚴重受阻。最離譜嘅係，民主黨議員何俊仁甚至喺議事堂上睇艷照，因此獲得「AV仁」嘅稱號，問你服未。

群眾眼睛係雪亮嘅，早前有項調查顯示，市民對議員整體滿意率跌至一成左右，創下十幾年新低，不滿意度就升至超過五成，立法會民望淨值係負四十一，仲低過港府嘅民望，簡直慘不忍睹。其身不正，何以正人？呢班政客成日以民意代表自居，鬆毛鬆翼，聲大夾惡，其實五十步笑一百步，議員嘅表現比港府官員更加不如，旨意佢哋監督政府，盞添煩添亂嘅咋。

見微知著，議會係社會嘅縮影，今日香港紛紛擾擾，躁動不安，立法會又點可能唔七國咁亂吖。就係因為政客不務正業，將大部分時間同精力浪費喺毫無意義嘅政治爭拗，經濟及民生冇人關心，香港至會不斷沉淪。嗱，隨着政改方案即將表決，爭拗愈演愈烈，喺一片政治狂熱之下，立法會都唔知仲會亂成點。一句講晒，政客靠得住，豬乸會上樹。唔想香港繼續沉淪，選民惟有自己救自己！