政情：「社會工作者」 何君堯被追究
新界關注大聯盟發言人何君堯（Junius）早前出席一個論壇時，隨口講咗句「我係一個普通市民，但亦都係一個社會工作者」，點知引起軒然大波。社會工作者總工會（社總）成員連同社福界議員張國柱尋日向社會工作者註冊局請願，要求嚴肅處理Junius疑似冒認社工一事，追究佢嘅法律責任。
「正常人思維都知唔係」
社總總幹事吳偉釗話，註冊局回應稱會按「正常程序」處理，意味將會報警。佢話以往有社工唔記得交註冊費，但繼續用社工之名，局方都會報警，今次Junius連社工都唔係，如果唔報警，其他社工都會唔忿氣。
Junius就話，當日係講緊「社會上工作嘅人士」，又話以正常人思維都知佢唔係社工，如果咁都要告，唔怪得依家嘅社工解決唔到社會問題，又形容報警行為草率喎！但有網民就話，按Junius嘅講法，咁喺超市工作嘅人咪等於超人？