正所謂「三歲定八十」，一個人有冇領袖風範，可能睇吓細個有冇做過班長就知。但人不可以貌相，貴為「大狀」嘅立法會法律界議員郭榮鏗（Dennis）自爆，雖然係「喇沙仔」出身，但由細到大成績都唔好，又唔識得同老師打交道，成舊爛泥咁。Dennis仲話，咁多年喇沙生涯中未試過做班長。不過佢畢業後去咗外國升學，返港後發展又唔係咁差嘅。
另外，聲大大嘅蔣麗芸（Ann）就真係「三歲定八十」，佢讀小學時做過班長兼風紀總隊長。
話說試過有次放學時間，有好多同學仔衝閘，情況都幾危險，Ann情急之下施展獅吼功，大叫「停止！」即時嚇窒成班同學仔。當時細細粒嘅Ann仲走入人群，一手抱起面都青晒嘅女同學到醫療室休息。估唔到Ann唔止聲大大，仲好似食咗「大力菜」咁好力。