政情：偏幫泛民 袋巾傑惹公憤
泛民主派去年成功「佔領」財務委員會轄下嘅工務小組委員會多數議席，尋日小組開會時，就上演一場小組主席梁家傑（袋巾傑）公私不分、偏幫泛民嘅鬧劇。話說人民力量陳偉業（大舊）同保險界議員陳健波掀起罵戰，大舊鬧建制派係「狗奴才」，陳健波就鬧大舊係人渣。詎料袋巾傑主動幫大舊解畫，指「狗奴才」冇特定鬧某一個人，但就先後三次逼問陳健波會否收回言論，激到陳健波離場抗議。
逼陳健波撤「人渣論」
事緣建制派議員批評泛民不斷在會上重複問問題，試圖拖延啟德體育園區嘅撥款申請。社民連梁國雄（長毛）率先發難，質疑陳健波冇睇過相關文件，仲嘲諷其助理冇寫稿畀佢讀。陳健波反譏冇睇文件嘅係長毛，又話即使助理寫埋稿長毛都唔睇。
大舊隨後加入狙擊陳健波，「見到陳健波呢啲保皇黨真係火起」，批評建制派支持嘅工程項目「不斷超支又超支」，又斥「議會內啲狗奴才」，總之係政府做嘅就支持，完全唔理成本效益。陳健波亦不甘示弱，直斥「邊啲人係狗奴才，市民好清楚……陳偉業呢啲人渣就要小心啲」。
袋巾傑隨即問陳健波，會唔會考慮收番「人渣」言論，陳健波就要求先裁決大舊講嘅「狗奴才」。袋巾傑面不改容幫大舊解釋話，「狗奴才」冇特定指某一個人，大舊亦附和指有人對號入座。袋巾傑反問陳健波會否收回言論。陳健波唔單止拒絕收回，仲大鬧「所有拉布嘅人都係人渣，係香港人渣，議會人渣，令所有人蒙羞嘅人渣」，袋巾傑認為大舊係清楚被指定為拉布嘅議員，即係「人渣」明顯話緊大舊。主席偏心到咁出面，再拗都嘥氣，陳健波於是揚長而去。
身為大律師 雙重標準
罵戰期間，好多人都睇唔過眼袋巾傑嘅雙重標準。好似獨立議員謝偉俊就話，袋巾傑作為大律師，應該好清楚喺誹謗案中，只要前文後理指緊某人即已構成指控，直指袋巾傑唔能夠厚此薄彼，令狡滑嘅議員講完唔認數，逃之夭夭。袋巾傑就懶懶閒話，唔打算就此作辯論。結果單係處理呢場無謂爭拗就用咗十幾分鐘，認真浪費生命。