中環出更：一舊雲執人口水 促資助驗乳
立法會議員葛珮帆（EQ）日前為全港婦女出頭，就爭取政府資助女性檢查乳房預防乳癌，向食物及衞生局局長高永文挑機，質疑高永文身為男人，似乎唔多關心乳癌呢件「女人心事」。慢半拍嘅民主黨（白鴿黨）黃碧雲（一舊雲）明知已經被截胡，都要執EQ口水尾公布三月完成嘅問卷調查，促請政府推廣及資助婦女進行乳房Ｘ光造影檢查，認真冇癮。
倒米話白鴿黨兜踎
既然一舊雲咁有心，咁白鴿黨會唔會帶頭資助婦女做檢查？一舊雲竟然倒自己米，話白鴿黨最「兜踎」，自己都係因為任教理工大學先可以免費做身體檢查，順便檢查埋乳房，最多平日沖涼嗰陣自己檢查吓。
講講吓，一舊雲將矛頭直指所有男性，批評多年來都係由男士出任食衞局局長，導致政策冇周全考慮從女性角度出發，連財政司司長個位多年來都係男士揸莊，所以財政撥款都冇特別維護女性權益，反映女士參政嘅重要性喎！咁都有得抽水，真係冇嘢講。
卓妮