中環出更：工展會登台 為港拓商機
中華廠商聯合會旗下嘅兩岸四地聯誼交流委員會，日前於廠商會會長李秀恒（Eddy）嘅山頂大宅舉行交流晚宴，台北經濟文化辦事處處長嚴重光率領一眾台灣駐港機構要員出席，四十幾人共聚一堂好熱鬧。身兼廠商會展覽服務公司主席嘅廠商會副會長戴澤良（Tony）報喜話，工展會進軍台灣終於有「零的突破」，明年一月底展覽公司將組織近百個參展商到台北參加年貨大展，為香港特色年貨跨海搵商機。
講起香港特色貨品，好多人都話香港冇手信，文化部駐港代表光華新聞文化中心主任盧健英就感受好深刻，事關最近佢要返台灣，正為帶乜嘢手信而煩惱。
經濟部駐港代表遠東貿易中心主任陳愛蘭話，其實好多台灣朋友鍾意港式奶茶、臘腸及蘿蔔糕等，所以預先包裝產品應該好有市場。睇嚟今次廠商會喺接近年關時拉隊去台北參展，勢必大受歡迎喇！
獲台北經文辦力撐
Tony透露，工展會一直想喺兩岸四地舉辦，依家已成功進軍內地，只有澳門及台灣仍未成事。佢又話，工展會到澳門舉辦嘅難度唔大，但係到台灣就面對唔少問題，包括唔少港貨其實喺內地製造，故難以獲台灣放行，不過皇天不負有心人，最近喺台北經濟文化辦事處大力協助下，終於踏出第一步，下一步計劃獨立喺台灣舉辦工展會。
當晚兩岸四地聯誼交流委員會主席羅台秦、副主席周維正、台北貿易中心主任孫至誠等人都有到場，Eddy太太李阮錦鑾就忙於打點，不亦樂乎。
卓妮