追販推跌途人 食署罔顧安全
鬧市執法連累行人受傷，食環署被轟漠視安全！有市民早前行經中環碼頭行人天橋，期間適逢食環署採取執法行動，混亂中被推跌地上擦傷手腳，即時向食環署職員求助，不獲施援更反被要求自行報警處理。立法會議員直指食環執法行動已非首次發生意外，不但導致市民受傷，更有職員殉職，建議當局從速檢討現有指引及人手調配，防止再有意外發生。
「好似亂開槍咁危險」
「行行吓嗰時突然畀人喺背後推咗一下，跟住成個人跌咗喺地，右腳同左手都擦傷咗。」王先生於復活節假期期間行經連接中環碼頭與中環的行人天橋，當日天橋有大量市民，未料在人潮中突被人從後撞跌倒地，疑與食環署職員追捕小販有關，「我見佢哋追緊個推手推車嘅女人，係咁橫衝直撞，就好似警察為咗捉賊喺人堆中亂開槍一樣咁危險。」
王隨即向執勤職員表明受傷，惜未獲任何援助，反被要求自行報警處理，「佢哋淨係叫我自己報警，送去醫院時都冇人陪我去。之後醫生就批咗兩日假，依家手指仲留咗條疤痕。」王坦言不滿食環署職員為求執法而無視市民安全。
食環署職員執法期間引致市民受傷已非首次發生，去年便有六旬老婦行經灣仔一行人天橋時被撞倒，需送院醫治。
食物環境衞生署發言人證實，小販管理特遣隊於事發當日在涉事地點掃蕩無牌小販及檢控違反法例人士，後亦接獲相關投訴，現正調查。發言人強調小販事務隊人員執法時會以小販、行人及自身安全為重，並採取最恰當行動策略。
市民可按損傷索償
「如果個情況係可以預見同避免，而食環署又冇採取相應措施，咁就要負責任，就好似警察捉賊都要考慮現場環境，同消防員為咗救火要破門嘅情況唔同。」法律界人士黃國桐指食環署或需為所引起損失負責，市民有權就此索償。
立法會食物安全及環境衞生事務委員會委員麥美娟則認為，食環署應早日檢討現行執法指引，「同類型意外已經唔係第一次發生，仲要冇幾耐之前先發生咗食環署職員森哥拉小販殉職件事，食環署真係好應該諗吓喺鬧市行動嗰陣點樣會安全啲。」麥美娟又指，現時前線人員人手緊絀，亦為問題根源之一，建議增聘人手，「有小販管理隊職員都同我反映話人手唔夠，執法要盡快完成任務走人，如果夠人手一嚟唔使咁心急，二嚟出咗事都可以照顧番傷者。」
記者︰呂耀焜