人民力量（人力）於二○一一年區議會選舉，打住「票債票償」口號狙擊支持立法會「一人兩票」方案嘅民主黨（白鴿黨）。事隔四年後，有人力中人指除非有泛民政黨於年中表決政改方案時「轉軚」，否則唔會再「票債票償」；相反會於年底區議會選舉，集中火力狙擊建制派「雙料議員」，當中特別點名考慮狙擊東區漁灣選區議員鍾樹根。
不過眾所周知，鍾樹根於東區打滾多年有一定實力，睇怕人力要小心揀選狙擊對手，如果個個都類似鍾樹根呢啲對手，到時要有心理準備預咗係送死居多。
除咗打算集中火力狙擊建制派，據知人力年底區選部署將會奉行「精兵制」，暫時挑選十幾名社區主任積極考慮參選，主力於新界東，如將軍澳出選，據聞當中唔少都係人力議員陳志全（慢必）嘅助理。