中環出更：長毛被斥霸公屋 愈辯愈黑
社民連立法會議員梁國雄（長毛）每月領取逾九萬元嘅人工，仍居住於公屋惹來質疑，日前網上流傳一段短片，片中嘅長毛正返回住所，有人鬧爆長毛「霸公屋」、「拎黑金」，長毛就以「收皮啦，師奶」回敬。短片於網上曝光後，一名自稱係社民連成員嘅人幫長毛解畫，但同時踢爆長毛每月將大部分薪金捐咗去抗爭基金，真係愈解畫愈幫倒忙嘞。
「黨友」護航幫倒忙
尋日一名自稱係社民連成員嘅人於社交網站上，主動回應長毛霸佔公屋嘅質疑，指房署會定期審查住客嘅財務情況，包括人工同資產，雖則長毛人工係過咗標準，但佢將大部分人工捐咗出去，所以資產並冇過標準，只需交返市值租金，住公屋亦合理合法，而非房署放生。
該名自稱社民連成員其後踢爆，長毛係將人工捐咗去一個抗爭基金，最常用喺支付社運人士被捕或被告嘅保釋金、律師費同罰款；另外部分新成立嘅社運團體，或者想選區議員又冇資金嘅人都會問基金拎錢。
長毛繼早前涉收取壹傳媒集團前主席黎智英秘密捐款要解畫，依家又涉用議員人工資助抗爭活動，真係一波未平一波又起，有排至可以解釋清楚。
卓妮