狗咬人唔係新聞，人咬狗至係新聞。香港基建超支早就見怪不怪，反而唔超支至出奇，尤其係高鐵工程，延誤及超支更加唔係新聞，一早預咗嘅喇。家陣嘅問題係，究竟超支幾多呢？
即係咁，舊年港鐵將高鐵工程造價修訂為七百一十五億元，比預計多咗六十五億元，但外界一直盛傳最終造價肯定唔止呢個數字。呢，立法會交通事務委員會主席田北辰透露，從港鐵內部及承建商消息得知，高鐵最新造價高達八百五十億元，較原先估算大增三成，即係超支二百億元，問你怕未。
對於最新造價，港產官僚唔敢正面回應，淨係話目前正進行評估，第二季會交代喎。好明顯，聽語氣就知道心虛喇，佢哋根本掌握唔到具體數字，只能含糊其詞，至怕工程繼續延誤，造價繼續飆升，埋單計數隨時唔止超支二百億元添吖。
最好笑嘅係，港府同港鐵互扯貓尾，互相卸責，都要求對方為超支埋單。其實，根據雙方簽署嘅協議，港府要證明港鐵疏忽，至可以要求港鐵支付超支金額，而港鐵就賴西九總站地底「石頭硬」，並非疏忽引致，大家各執一詞，都唔肯認帳。老實講吖，高鐵工程搞成咁，雙方都有責任，港鐵管理疏忽，固然有負所託，而港府監管不力，加上有包庇及隱瞞之嫌，更加難辭其咎。正如有人話齋，就算港府肯孭起超支呢條數，亦要向立法會追加撥款，到時都幾難過關，「今次好麻煩」。
冇錯嘞，高鐵工程唔止好麻煩，直情好濕滯。自十五年前港府建議興建區域快線即依家嘅高鐵，後來被貪曾列為十大基建項目之一，從此便多災多難。首先係遷拆菜園村時遇到阻力，跟住係立法會審議高鐵工程撥款時遇到議員拉布，近年又接連爆出工程延誤及超支醜聞。一波三折之下，造價不斷飆升，最初區域快線造價只係百幾億元，改為高鐵後估價亦只係三百幾億元，依家已增至八百五十億元，遲啲可能仲唔止添吖，唔怪得有人話高鐵係無底洞喇。最離譜嘅係，港鐵前行政總裁韋達誠因為高鐵工程延誤而提早離任，結果冇受到懲罰不特止，反而滿載而歸，除獲發五百八十萬元基本薪金及津貼，仲額外獲得一千五百七十萬元合約結算金，因禍得福，問你服未。
講起真係醜怪，高鐵內地段早已通車，而香港段仲喺度拖拖拉拉，二○一七年底究竟可唔可以通車，睇怕連港府都唔敢寫包單。過去以高效率見稱嘅香港，依家居然淪落到咁嘅地步，簡直可悲！