民主黨「超級議員」何俊仁（AV仁）提出辭職公投，原意係想喺政改方案否決後重新團結泛民同其他佔中支持者，但結果反而加劇咗泛民之間嘅分裂同不信任。其中學聯及學民思潮最近雙雙表明唔會加入公投委員會，有民主黨人就以甩咗兩個轆嚟形容，擔心辭職公投單嘢遲早會「車毀人亡」！
民主黨議員單仲偕尋日坦言，學民前日表態拒絕力撐公投，增加咗整個運動嘅難度，尤其係民主黨內本來已經有唔少人反對AV仁辭職，現時反對聲音肯定會更大。佢又話公投運動最初有七個團體參加，依家學民中途唔玩，學聯又面對外憂內患，即係甩剩五個轆。
另一泛民中人更透露，辭職公投估計花費高達五百六十萬元，最初有兩個籌旗方案，其一係七個團體一次過各出八十萬，其二係每個團體先畀廿萬元，之後再喺大型活動集體籌款；依家班學民仔求其掉低廿萬就話唔玩，好似啲情侶分手畀「掟煲費」咁，非常不負責任，令佢哋要重新計過條數。