政情：三囍臨門幫葉劉除黑氣
新民黨主席兼立法會議員葉劉淑儀自大年初二喺沙田車公廟被麒麟撞飛後，自此是非多籮籮。佢日前一篇文章被指歧視菲傭更加搞到滿城風雨，最終要道歉先收到科。不幸中嘅大幸係，該黨下月輪住嫁女兼娶新抱，包括南區區議員陳家珮（Judy）、屯門區議員蘇嘉雯（Kaman）及葵青區議員徐曉杰（Jonathan），簡直三喜臨門，唔知呢三頭親事能否幫葉劉沖一沖喜，驅散黑氣呢？
陳家珮獲授御夫術
下月最早「封盤」嘅係Jonathan，佢嘅地頭喺青衣，但準太太係沙田公民力量成員，能夠跨區認識兼結婚，全靠兩黨去年初結盟，二人先開始認識。似乎兩黨「結婚」唔單止係選舉策略，仲造就唔少親事。去年先當選南區區議員嘅Judy亦計劃下月底同政圈外男友喺港島香格里拉酒店筵開四十幾席做人妻，佢自言年紀唔細，婚後會不設防造人添！Judy仲話，葉劉向佢傳授「御夫術」，包括喺婚禮上唔好搶晒啲嘢嚟講，要留番啲畀老公講喎。唔通呢啲係葉劉嘅經驗之談？
至於Kaman都係同黨友結婚，但佢透露由於準老公本身同Judy相熟，當二人宣布下月婚訊嗰陣，有街坊甚至同事都以為Judy同Kaman準老公先係一對，搞出個大頭佛。Kaman透露，二人係喺該黨年前舉辦嘅國情研習班上認識，黨就係佢哋嘅紅娘喇！
曾被批全年黑過鬼
記得葉劉被麒麟撞飛後，堪輿學家麥玲玲已批過葉劉喺羊年會多阻滯及麻煩，更加係「全年黑過鬼」，結果真係應晒衰是非口舌。依家一連三頭親事真係夾都冇咁啱時間，相信呢股喜事能量都幾巨大，或者可以沖走葉劉嘅黑氣，咁葉劉係咪要封定封大嘅人情呢？