中環出更：霍何綺華籲驗乳 勿靠自摸
乳癌係女性殺手病之一，但肯做乳房檢查嘅女性，仍只佔少數。香港乳癌基金會日前舉行慈善郵輪夜，慶祝成立十周年，逾四百位賓客及善長齊到賀，包括醫管局主席梁智仁夫婦等。曾患乳癌康復嘅基金會主席霍何綺華，以過來人身份分享抗病經歷，又提醒女性咪以為靠自己用手檢查乳房有冇硬塊就掂，咁樣係忽略潛在風險，呼籲姊妹們千祈唔好靠「自摸」。
定期做X光造影檢查忌怕煩
霍太話，雖然本港有八成女性知道定期做乳房X光造影檢查係好重要，但大多數人因為工作忙碌，會真正睇醫生嘅只得兩成人，反映及早偵測乳癌意識薄弱，提醒姊妹們年年驗身，唔好怕煩。康復十二年，霍太早已養成健康飲食習慣，早餐食麥皮加蛋白，又少食雞皮及雞膏。至於唔少闊太至愛嘅炒股嗜好，佢就笑言太剌激，怕影響情緒，少玩為妙喎。
以母為鑑 馬天惠飲食清淡
卓妮轉頭遇到先施百貨家族後人馬天惠（Esther），佢透露媽咪四年前患上乳癌二期，經電療後康復理想，所以Esther都注重健康：「我媽咪鍾意食鹹魚、梅菜，可能因為食太多醃製食物，好唔健康。」佢以此為鑑，平日飲食清淡，每周只食一次牛肉，又跑步、游水強健心肺，仲不忘每年做婦科檢查添。
乳癌基金會創會人張淑儀醫生就話，現今醫學日新月異，早期發現嘅乳癌有八、九成機會痊愈，呼籲患者病向淺中醫。佢自己就崇尚健康生活，除多吃蔬菜生果，仲每日耍楊家太極，十二年來風雨不改。
卓妮