水耕種植屬於乜行業？好多人都會答農業。冇錯，耕種梗係屬於農業喇，不過世事冇絕對，家陣有個新興概念叫做「植物工廠」，工廠一樣可以「製造」植物，就好似十五樓養嘅牛牛咁，換句話講，水耕種植既屬於農業，亦屬於工業。
話說近年水耕菜喺世界各地大行其道，港府亦學人趕時髦，聲稱有意推廣工廈水耕種植，仲計劃將空置嘅工廠大廈改建成植物工廠，並喺較低樓層闢設農墟喎。
即係咁，發展水耕種植本來有得諗o架，既可以成為一種新興行業，又可以為市民提供健康蔬菜，仲可以解決工廈空置問題，一舉數得。可惜吖，港府一味大隻講，所謂發展水耕種植，冇清晰定位，冇政策配合，連工廈經營水耕場會唔會牴觸法例都冇統一答案，喺種種限制之下，經營者根本無所適從。本報調查發現，近年本港先後出現七間工廈水耕種植場，其中兩間已經結業，而由港府資助嘅研發中心亦勁蝕幾百萬元，睇怕都唔捱得幾耐咯。
係人都知，大部分工廈均定明使用者需從事工業或倉存用途，違例者分分鐘被釘契。港府淨係鼓勵發展水耕種植，但又唔放寬工廈限制，你話係咪靠害吖？呢，有間位於觀塘工廈嘅水耕種植場，曾獲民政事務總署「夥伴倡自強社區協作計劃」撥款八十萬元種植水耕沙律菜，結果居然被地政總署釘契；而有間位於鯉魚門工廈嘅水耕菜場，就因為工廈所在土地已經規劃成住宅，亦只能被迫結業。
漁護署就講得輕鬆嘞，設立水耕種植場毋須署方審批，但署方一直建議有興趣投資人士，應先向工廈管業處、地政總署及屋宇署等查詢土地用途嘅規定；而食衞局就話正與相關政策局及執行部門研究如何規範呢個新興行業喎。當局大耍官腔，擺明又係互相卸責，等佢哋研究得來，蚊都瞓蛇都死喇。正如有人話齋，水耕就好似一個孤兒仔，各方面都冇提供協助，當局再唔推出具體措施，呢個新興行業隨時胎死腹中嘅咋。
所以話，港產官僚志大才疏，做任何嘢都係有姿勢冇實際。早前當局係威係勢進行公眾諮詢，聲稱要發展新農業，睇怕又係得個噏字，連水耕種植都搞到唔湯唔水，經營者雞毛鴨血，又點樣發展新農業吖？再講喇，香港土地資源買少見少，各項成本不斷上漲，農業早就式微，仲搞鬼搞馬咩。計功夫茶話齋，家陣房屋問題迫在眉睫，如果港府手上有地，不如用來起樓好過喇！