探射燈：「餵奶神器」湊B 嗆喉入肺可致命
「餵奶神器」成母親恩物？時興自拍神器，連餵奶亦有捷徑，近日網上購物平台出現多款聲稱懶人必備的「餵奶神器」，只要將奶樽放在支架上，再固定在嬰兒床或椅邊，便可讓嬰兒自行吸吮奶樽，大大節省餵奶時間。產品一出，在網上引起熱烈討論，不少母親直呼方便，紛紛有意購入「代餵奶」。不過，醫學界人士警告，餵奶神器未能自動調節角度，加上嬰兒的頸部肌肉發展未成熟，容易出現嗆喉情況，一旦奶水倒流至嬰兒肺部，隨時致命﹗
「當你一湊二，仲要孖B，冇人幫，佢哋又同時喊食，就覺得好需要了。」網上討論區的媽媽就「餵奶神器」展開激烈討論，有網民認為神器值得一試，「我都覺得如果work的話，無問題，好多嘢都係人類發明幫輕自己的。」但亦有網民質疑神器的功效及危險性，怪責有意使用「餵奶神器」的網民，「連餵奶都要用神器不如唔好生啦。」
支架夾奶樽 最平賣40元人仔
本報記者發現，有網上購物平台出售的「餵奶神器」共有三款，銷量最好的一款近似手機支架，約長八十五厘米。賣家教路，以支架頂部夾住奶樽，並固定在嬰兒床或椅子上，調節好角度，便可以輕鬆餵奶，該款「餵奶神器」售價僅人民幣四十元。
而另一款聲稱是「雙胞胎媽媽必備」的神器名為「餵奶枕」，該枕頭狀似「口水肩」，前端中央可放入奶樽，將它套在嬰兒頸部後，便可吸吮。第三款則是四腳支架，中間以布帶吊起奶樽，售價為人民幣百多元。
本報記者將手機支架款式的「餵奶神器」交予註冊助產士及兒科專科醫生檢視，兩人均表示若以神器餵奶，嬰兒隨時有生命危險。香港人才培訓中心陪月課程導師、註冊助產士何柏鈴指，不少新手爸爸向她坦言想購買「餵奶神器」減輕工作，惟「奶嘴充滿奶水」是餵奶的基本原則，神器卻無法自動調整角度，令嬰兒容易「飲風」，引致嘔奶。
何稱，正確的餵奶方法是母親用手抱起嬰兒，讓嬰兒以四十五度角躺臥在懷中，但若以神器餵奶，嬰兒要平躺在床上自行進食，由於嬰兒的括約肌鬆，奶水容易倒流至氣管，導致肺炎，「人手可以控制到餵奶角度、速度同分量，因應BB反應去調節，BB食一陣又要幫佢掃風。如果你由佢自己食，唔睇住佢，就算有危險即時過去都未必趕得切拎走個奶樽，會好危險。」
兒科專科醫生馮宜亮指，餵奶期間嬰兒若出現三種情況，母親必須暫停餵食，包括鼻塞、氣促及肚子不適並出現嘔奶迹象，「如果用餵奶神器餵奶，奶樽入面嘅奶會不停滴，但BB有好多情況，要停一停先可以繼續食奶，任由BB繼續食，就會好似做手術前冇禁食咁，食物或者胃液會流入肺部，令肺膜腫脹，會缺氧致命，好嚴重。」
「媽媽真係想用 都唔可以行開」
他提醒，○至三個月的嬰兒頸部肌肉尚未發展成熟，無法自己控制郁動，就算有不適亦難以避開奶樽，容易「出事」，「如果有媽媽真係想用，都唔可以行開，奶樽亦都要揀奶嘴口唔大嘅。」
香港母乳育嬰協會主席馮鄧妙智指，以神器餵奶威脅嬰兒生命安全，絕不建議父母使用。她稱，世衞建議嬰兒頭六個月應進食母乳，除了較奶粉健康外，亦有助促進親子關係及訓練嬰兒吸吮能力，「初生BB唔似其他一歲、兩歲小朋友可以自己拎住奶樽食，父母應該每分每秒都照顧住BB，有事遲咗幾分鐘先發現，對生命會有危險。」
圖﹕甘偉倫、李子輝
文﹕溫盈盈