平日高官出巡，有嘢想埋位講都係全靠外號「行街隊」嘅政府新聞處同事，就地搭個俗稱「咪兜」嘅咪架，方便記者擺咪牌同錄音筆。不過，隨着香港愈來愈多電視台及網絡媒體，部分重要時刻更吸引中外傳媒採訪，「咪兜」經歷幾代變身都唔夠用，多出嘅咪牌經常要用牛皮膠紙加固，都咪話唔牙煙。據聞新聞處正研究再「擴建」咪兜，希望容納到更多媒體報道。
聽聞上一代政府新聞處創先河，自家設計流動咪兜方便記者採訪，經歷多年演變，由第一代嘅十個放咪位，加到十二個，直至現時十四個位都開始唔夠用。
據知新聞處正研究加夠十六個位放咪，但亦要睇咪兜設計承唔承受到咁多咪，而官員講嘢時嘅視覺效果都要考慮，所以咪兜「擴建」之路仲係漫長。
另外，新聞處管理嘅「政府新聞網」Facebook專頁日前因為上載為女同事餞行嘅相片而被網民「負評」，但有睇法認為有人鬧總好過冇人知，因為新聞處正正想同年輕人輕鬆交流，希望發放新聞稿之外，仲可以多啲軟性話題喎。