政情：送仁一程 學民縮骨

稱學生與政黨保持距離

去年佔領行動衰落時期，學民同學聯苦無出路，衝擊包圍不成，同政府談判又破裂，上京見面又被阻，最終雙學之一嘅學民率先游說AV仁辭職，繼而引發變相公投。當時好多政界中人都覺得，咁做同叫白鴿黨送死無乜分別，因為風險極高，所以白鴿黨最初反應麻麻，隨即惹來學民猛烈批評。之後白鴿黨心諗，既然咁多個黨都撐公投，無理由缺席唔玩，所以先「落疊」應雙學要求搞公投，仲講明喺政改表決前辭職。

不過，最近去到商討辭職公投細節階段，學民又玩嘢，話只會撥廿萬元支持AV仁辭職公投，但唔會參與行動決策，聲稱學生要同政黨保持一段距離喎。尋日學民嘅聲明又多次強調支持AV仁辭職公投，只係基於種種原因，例如泛民唔肯「拉布」等，令佢哋發現泛民議員喺路線上同學生有唔同取態，聲稱好容易有爭拗，再加上學民好唔同意公投備忘錄內一句「各組織有責任擱置泛民主派間的爭拗」，所以經過會員大會後，學民決定唔加入「公投委員會」。

唔肯同船 疑隨時反枱

講白啲，即係學民擔心同泛民坐同一條船後，就無得繼續鬧白鴿黨，所以咪唔想加入公投委員會囉！由於AV仁係超級區議會議員，一旦辭職需要進行全港補選，因此上次泛民五方平台開會，都預計各黨派最少上繳八十萬元，先有足夠資金搞公投。不過，依家學民只肯畀二十萬元，仲要唔肯同泛民同坐一條船，擺明係為咗隨時反枱而作準備。唔知道白鴿黨知道學民縮沙後，又會唔會擱置辭職公投一事呢？