中環出更：叫選特首 阿芸擺樹根上枱
政府公布特首普選方案，建議喺「出閘」階段，每名提名委員會成員可以暗票形式最少提名兩位參選人，有人大讚此舉有助溫和理性泛民主派人士順利「出閘」，但事實又係咪咁呢？立法會議員蔣麗芸（Ann）尋日接受電台訪問時就自爆提名策略，話如果到時只得兩名特首參選人，分別為建制、泛民背景人士，佢分分鐘呼籲黨友鍾樹根（樹根）參選特首，以增加參選人數目喎。
明踩泛民 黨友中箭
上屆特首選舉已經做緊選委嘅阿Ann解釋，佢會以參選人能力作提名準則，強調「不會只選心儀，因為唔係揀老公！」如果提名階段有三個人畀佢揀，當然會揀兩個愛國愛港人士啦，但如果到時得兩個人畀佢揀，例如一個梁振英，一個係AV仁，咁點呢?佢話為咗唔想將手上一票焗畀AV仁，會即時建議黨友樹根參選特首，都唔益AV仁喎。阿Ann咁講表明上係踩緊AV仁，但實際效果係連自己黨友都踩埋。
無啦啦中箭嘅樹根，知悉阿Ann將佢同AV仁放喺同一個層次後，就話「咁即係擺我上枱啦」。不過，佢可能知道阿Ann份人係咁鍾意講笑，所以叫大家唔使咁認真，反而多謝黨友咁賞識佢喎，但佢就講明無意參選特首嘞。
卓妮