好多人以為「最牛釘子戶」係內地特產，查實比起港產釘子戶，內地同胞濕濕碎啦。呢，有人霸佔二百億元地王，三十年來賴死唔搬，問你服未！
功夫茶講緊嘅咪係香港郵政囉。有近四十年歷史、位於中環黃金地段嘅中環郵政總局，坐擁無敵海景，係罕有嘅市區貴重地皮，估計地價高達二百億元，用嚟做郵局，簡直係暴殄天物。查實港府早喺八六年已經計劃將郵政總局搬走，但一直物色唔到適當地方，直到一○年決定撥出九龍灣一幅地皮，將中環總局以及受沙中線工程影響嘅紅磡灣國際郵件中心合併重置。
好嘞，九龍灣郵件中心舊年終於落成啟用，照計中環郵政總局應該搬遷嘞啩，點知香港郵政藉口多多，一時話未有具體搬遷時間表，一時又話仲未搵到合適地方繼續服務中區居民，總之拖得就拖，賴得就賴。
嗱，呢啲咪叫生人霸死地囉。有立法會議員就講得啱嘞，郵政總局根本唔應該霸佔海濱地段，嗰度位置方便，如果用嚟做寫字樓或其他商業用途，好值錢o架。唔使問阿貴，香港郵政已經獲批九龍灣地皮，依家仲喺中環賴死唔走，擺明想政府畀多塊地，咁仲唔係得寸進尺？所以話啫，「最牛釘子戶」呢個封號，唔係浪得虛名o架。
講真，搬遷總部話都冇咁易，如果香港郵政唔係有心玩嘢，一早就搞掂喇。正如有人話齋，香港郵政只要喺新廈落成後，闢出一層開設小型郵局，就可以繼續服務當區居民，點解咁都唔考慮呢？
講起香港郵政嘅服務，簡直係把幾火。由於管理混亂，經營不善，郵政年年錄得巨額虧蝕，唔諗吓點樣改善服務不特止，反而一味諗縮數，唔係縮短郵局營業時間，就係索性摺埋，完全無視市民需要，搞到怨聲載道。
當然喇，香港郵政烏煙瘴氣，醜聞多多，呢啲只係冰山一角咋。淨係「失信於民」醜聞，舊年就有超過五千宗，平均每日唔見十幾個郵件，都咪話唔誇張。咁都未算，香港郵政近年不斷將服務外判，之後就闊佬懶理，關人個關，好似海外郵包存倉服務咁，承辦商唔夠地方，惟有將郵件玩層層疊，結果搞到蓉蓉爛爛，甩皮甩骨，直到傳媒揭發，香港郵政至急急補鑊。服務求其都算嘞，最離譜係不務正業，居然走去滋擾傳媒，充當政治打手，簡直係自取其辱。
一句講晒，香港郵政唔單止浪費靚地，更加浪費公帑。反正家陣已經唔興寄信，私人速遞公司又開到成行成市，不如索性執咗佢好過啦！