政情：邱達昌父女曝光率突增

政府日前公布委任能源效益標籤計劃嘅法定諮詢機構上訴委員團成員，遠東集團創辦人邱德根孫女邱詠筠及「鋼鐵大王」龐鼎元孫女龐心怡榜上有名。咁啱邱詠筠父親邱達昌早前夥拍中港商界勢力競逐免費電視牌照，消息震撼全城。邱家父女原本專心打理家族生意，但近期突然轉趨活躍，曝光率急升，唔知葫蘆裏賣咩藥呢？

政府刊登憲報委任十多名新成員，由明天起生效，任期三年。名單中以工程師及專家學者為主，因此身為企業第三代嘅靚女邱詠筠及龐心怡零舍突出。邱詠筠一向喺社交界好活躍，但係好少涉足公職，佢依家係家族企業帝盛酒店集團總裁，同出任主席嘅父親邱達昌拍住上。

至於龐心怡除咗有「龐」大背景外，仲係WOM guide食評嘅創辦人之一，搞得有聲有色。