政情：學聯瀕瓦解 勢遭分身家
佔領行動後，學界對香港專上學生聯會（學聯）喺行動上嘅處理手法及立場十分不滿，繼香港大學率先退出學聯之後，理工大學及浸會大學亦相繼退聯，科技大學及城市大學則已成立退聯關注組，退聯潮一發不可收拾，原本由八間大學學生會組成嘅學聯正面臨瓦解。面對近半院校退聯嘅局面，擁有逾千萬元儲備及物業嘅學聯隨時會被要求分身家，睇嚟學聯秘書長羅冠聰（Nathan）要攝高枕頭諗吓計喇！
被指懶懶閒致退聯潮蔓延
對於學聯釀成依家呢個殘局，有學聯老鬼就歸咎於學聯對退聯掉以輕心、懶懶閒。睇番港大退聯公投嘅投票結果，支持票只多過反對票約二百票；理大同浸大嘅支持票雖然較多，但其實投票人數並唔多，理大先啱啱夠一千七百人嘅法定人數，浸大投票率亦只有一成四。如果學聯認真啲拉票，情況可能逆轉。以第二間發起退聯嘅嶺南大學為例，當時仲係學聯常委嘅Nathan係嶺大學生，佢就吸取港大教訓，落力拉票，結果成功避過退聯。所以話，雖然盛傳北京喺背後發功打散學聯，但如果唔係學聯誤以為將退聯問題低調化就得，學聯亦唔使搞到如斯田地。
中大關注組謀再聯署退聯
不過退聯危機陸續有來，中文大學尋日公布，因為聯署有效簽名不足法定人數，無法啟動退聯公投。雖然係咁，中大退聯關注組就揚言會重新計劃聯署，或者尋求學生會代表會主動發動退聯公投嘅可能性。但據了解，中大學聯老鬼亦會發功，力保中大唔使退聯。
面對已有三間大學退聯嘅現實，學聯不可不準備應付分身家嘅可能性。唔計學聯持有嘅物業，聽聞學聯單係緊急儲備基金都有一千萬元，仲有日常戶口同早前就罷課及佔領行動而設嘅籌款戶口，儲備分分鐘逾二千萬元。萬一學聯真係瓦解，點樣處理呢筆錢，都係件令人頭痛嘅事。