中環出更：議員比廚藝 海軍鬥水兵
立法會議員平日把口講嘢就叻，但一落手煮嘢食就個個變晒蝦兵蟹將，騰晒雞。尋日扶康會舉行烹飪比賽，請來一班議員夥拍智障人士下廚比賽。卓妮見啲議員着起圍裙、戴上廚師帽，似模似樣，但一揸起鑊鏟就雞手鴨腳，有人炒到成枱都係，有人煮到黐晒底，仲有人搶火添，嚇到主持人都驚叫「火燭呀」！
胡志偉炒到污糟邋遢
有份參賽嘅議員胡志偉聲稱自細不時喺屋企煮飯，但係太太嫌佢成日搞到廚房污糟邋遢，次次都要幫佢執手尾，所以近年都唔畀佢入廚房。佢臨場表現唔差，拋鑊時有兩吓姿勢，但個場面正如佢自爆咁，搞到亂七八糟，事關佢炒餸時唔小心跌咗啲食材落地，上碟時又整跌一啲喺爐面，難怪佢被太太投訴喇！
梁家傑煮燶鑊兼搶火
議員梁家傑仲論盡，佢一開波就搶火，嚇到主持人呱呱叫，嗱嗱聲換過一隻鑊。但係佢炒帶子時炒到個鑊燶晒，結果整一碟餸前後用咗三隻鑊，主持人忍唔住笑佢，平日講嘢已經火上加油，點知連煮嘢都係咁，仲話做佢拍檔都咪話唔驚喎！
早排患上胃黏膜淋巴瘤嘅議員張國柱都有到場，佢話患病後要戒口，西醫話唔好食燕窩、雞及大閘蟹，中醫就叫佢唔好食燒鵝、牛肉及冇鱗魚，例如鱔及鰻魚等。但係戒晒口好冇趣，所以佢會買澳洲出產及有機飼養嘅雞隻，確保冇激素先食。
講起煮餸，前排網上瘋傳醫科生用手術刀將雞隻完美起骨，名廚周中就話，手術刀雖然鋒利，但咁細把刀花幾個鐘都未煮完一道菜，所以都係咪搞喇！
卓妮