油麻地：警方無視違泊嚴重
「條街單線行車，本身已經又窄又短，點解仲有咁多司機泊喺路邊，完全唔理過馬路嘅市民安全？」伍小姐早前途經油麻地德興街，發現上址違泊問題嚴重，不滿警方疏於巡查及執法，認為有變相放生違泊人士之嫌。
去年發逾六百張告票
警方發言人稱，根據紀錄，過去一年油麻地分區共接二十八宗涉及上址的違泊報告並發出六百二十六張告票。發言人說，每次接獲投訴後，均會即時派員到場跟進，強調將密切留意情況及採取相應執法行動。
不過，伍小姐坦言對有關回應並不滿意，「等到有投訴先去執法已經太遲啦，平時應該要主動多啲落區巡下，咁先可以真正解決到問題！」伍小姐希望警方正視問題並持續跟進，加強執法。