近年好多年輕囡囡都因為喜歡動漫作品而入行，就好似今日要介紹嚟自台灣嘅任育萱，佢自小就好喜歡睇動漫作品，之後見人哋玩Cosplay玩得咁過癮，於是佢又玩埋一份，最後仲做埋模特兒添！
今年廿四歲嘅任育萱，英文名叫Vanessa，十零歲就已經出道，最初只係柴娃娃玩Cosplay，後嚟加入咗相關網站，於是不斷拍造型照刊出，由於樣子可愛，身材高挑，所以寫真作品深受網友嘅歡迎，但由於做動漫服飾所費不菲，於是開始做兼職模特兒嚟幫補一下，最先同其他囡囡一樣先做外拍模特兒，後嚟愈嚟愈多人認識，加上參加過一啲模特兒嘅選美比賽，獲得唔錯嘅成績，於是得到電玩廠商嘅垂青，開始喺展場做埋Show Girl。由於任育萱最喜歡打電腦遊戲，所以佢話過唔收錢都要做！當年每逢電玩展，就一定見到佢嘅身影，之後大專畢業，由於主修傳播系，於是想喺影視圈發展，咪睇任育萱弱質纖纖，原來佢能歌善舞，口才仲十分了得添！
講起任育萱嘅本事，除咗以上所講嘅，原來佢文筆仲十分流暢，係個寫得之人，之前佢嘅微博就經常撰文刊出，同大家分享吓自己嘅感受，一直深得粉絲們嘅喜愛，家陣改為面書，寫文章少咗，但偶爾大家都可以睇到一啲佢嘅感言，亦都十分精彩。而講起精彩唔可以唔提佢嘅美腿寫真，因為任育萱身高有175cm，一雙美腿嘅長度就有42cm以上，所以唔搵佢拍美腿寫真，絕對係浪費。任育萱由2009年開始，一直到2011年都有接拍美腿寫真，每一輯都十分受歡迎，好評如潮，近年雖然少拍咗，因為全力喺演藝工作，但魔力猶在，早前喺佢官方面書上貼出雙腿試鞋嘅照片，由於雙腿實在太美，所以照片隨即引起全城熱話，可見任育萱雙修長美腿魅力不減，而且更勝當年呀！
簡介：任育萱嘅面書裏面，收錄咗佢好多寫真照片，不乏性感造型，大家仲要留意吓佢啲合照，有唔少圈中靚女模特兒，個個都一樣咁正咁養眼。
網址：http://www.facebook.com/gomyurnew
出生地：台灣
三圍：33-23-34
身高：175cm
撰文：龍四海