中環出更：遇病魔需自修 張仁良苦戰升學
和富領袖網絡日前舉辦周年大會暨大專院校總會就職典禮，一眾莘莘學子聚首一堂學習如何服務社會及擔當領袖策劃活動。卓妮見到香港教育學院校長張仁良都有出席分享個人經歷，原來佢當年升讀中七時，不幸患上肺結核，嚴重到返唔到學影響學習進度，係佢讀書年代遇到嘅最大挫折。
話說七十年代患上肺結核，要食足半年藥兼打針治療，加上該病傳染性高，張仁良惟有匿埋喺屋企自修。不過皇天不負有心人，喺佢堅持臥病苦讀之下，終於喺打最後一支針當日，收到中文大學取錄佢嘅消息。後來佢更乘勝追擊考埋獎學金去法國留學，仲娶埋個法國靚老婆返港添！佢坦言，成功冇秘笈，一定要正面同多聽取別人意見，盡早規劃人生。
女「辰」做錯 李宗德打手板
和富社會企業會長李宗德女兒李美辰就透露，自細家中管教好嚴，母親不時提醒佢哋讀書唔只係求分數，仲要學習操行、禮貌等。李宗德仲自爆以前都有體罰，但堅持只限於「打手板」，用自己隻手打愛女手掌，目的要自己都同樣感受到痛楚，希望小朋友明白有錯就要罰，當然呢個年代唔會再有體罰啦。
出席活動嘅仲有教育局副局長楊潤雄、公開大學校長黃玉山及理工大學校長唐偉章，前兩者一見到唐校長就大讚理大教學研究酒店嘅環境同食物都好，但太難訂位。唐校長就話，與同區酒店相比價錢合理，仲頗滿意目前該酒店做到收支平衡，難怪楊潤雄同黃玉山話難訂位喇。
卓妮