俗語話，江山易改，本性難移。一個前科纍纍嘅積犯，想叫佢收手都幾難，正如要求激進政客停止拉布一樣，簡直嘥氣。好似壹淫媒咁吖，多年來不斷侵犯東方報業集團知識產權，案例厚過電話簿，正式係：沒有最醜，只有更醜。
呢，話口未完又嚟喇。舊年十一月，壹蘋果網絡有限公司旗下網站《壹週Plus》刊登一張女模特兒Rosemary嘅相片，原來屬於東方報業嘅版權，同一張相片啱啱喺《好報》、《好報電子報》以及東網刊登過，兩日後竟然出現喺《壹週Plus》，唔使問阿貴，擺明又係不問自取喇。
為咗討回公道，東方舊年十二月入稟區域法院，控告《壹週Plus》所屬嘅壹蘋果網絡有限公司侵犯版權，要求頒發強制令，禁制被告作出侵權行為，交出有關相片，並作出賠償，以及按《版權條例》作出額外損害賠償。由於證據確鑿，無可抵賴，被告惟有跪低求和，向法庭繳存二萬零一元作為「附帶條款付款」，並支付二萬二千五百元律師費。
嗱，呢啲咪就係自取其辱囉，壹淫媒次次侵權，次次斷正，簡直係唔衰攞嚟衰。唔講唔知，過去十九年，壹淫媒因為侵權而向東方賠償或向法庭繳款，計計埋埋已經超過一百三十萬元，呢個紀錄相信都幾難有人打破。
「東方做，蘋果盜」，壹淫媒侵權盜版花樣百出，手法無奇不有，係百分之百嘅慣犯。早喺一九九五年三月，壹淫媒旗下《壹本便利》就擅自使用《東方日報》有關扑頭黨嘅報道同相片版權，結果自動向東方賠償一萬二千元求和。從此之後，壹淫媒好似慣咗手勢咁，侵權行為陸續有來。
最經典嘅例子係，九六年《蘋果日報》盜用東方擁有嘅王菲懷孕搭飛機獨家照片，東方告上法庭贏咗官司，點知法庭竟然掉番轉頭懲罰東方，要替爛果報支付巨額堂費。最後東方上訴到終審法院至得直，爛果報被裁定賠償三萬三千零一元及支付大部分訟費。仲有吖，爛果報網絡版「蘋果動新聞」○八年九月至○九年二月期間，至少三十三次抄襲東方旗艦網站on.cc嘅新聞報道，部分更加係百分之一百原文照抄，東方入稟高院要求頒發聲明同禁制令，爛果報除咗向法庭繳款一百萬元和解，仲被海關票控三十三項侵犯版權罪，爛果報承認其中八項控罪，合共罰款四萬元。
所以話，自作孽，不可活，壹淫媒死性不改，唔止信用破產，銷量更加跌到趴街。最好笑嘅係，壹淫媒旗下免費報《爽報》獻世冇幾耐就「爽」死咗，爛果報侵權成性，睇怕都係嗰頭近咯！