今時今日使用銀行櫃員機真係好方便，但市區重建局主席蘇慶和使用櫃員機就似乎有啲困難嘞。我哋尋日中午喺港鐵中環站見到蘇慶和企喺櫃員機前面，似乎唔係好睇得清楚櫃員機上嘅鍵盤，搞到要俯身兼除低眼鏡，貼近部機先至到鍵盤，距離近到幾乎可以同部櫃員機接吻咁滯。
不過，之後佢又要戴番眼鏡先睇到櫃員機螢幕嘅指示，如是者重複咗兩次俯身及戴眼鏡嘅步驟，先成功完成交易。我哋問蘇慶和係咪因為老花眼睇唔到鍵盤啦，佢就唔認係老花，只係鍵盤反光喎！
