政情：羅致光幫對家培訓人才
工聯會（工記）日前換屆，除咗核心領導層換咗幾個人外，更銳意擴大政治版圖，計劃派出至少四十人參選年底區議會選舉，又以「票債票償」為口號狙擊「拉布」泛民主派議員。為培訓政治人才，工記去年更成立「工聯學院」，仲搵咗民主黨（白鴿黨）成員、港大社會工作及社會行政學系副教授羅致光執教鞭。莫非工記唔驚羅致光係「無間道」？抑或羅致光真係吃裏扒外嘅呢？
林淑儀及卿姐唔介意
續任工記理事長嘅吳秋北透露，工聯學院由工記會長林淑儀任院長，自家培訓政治精兵，開班導師除咗榮譽會長陳婉嫻、全國港澳研究會副會長劉兆佳等，仲有羅致光負責教社福制度。林淑儀話，唔介意對方政治立場，該會副會長、建造業總工會理事長周聯僑都係學院學生添！
雖然羅致光因為其溫和政治立場，早已淡出白鴿黨核心，但公然幫「對家」培訓又真係講唔過去。不過，我哋問過白鴿黨主席劉慧卿，佢先係話好耐冇見過羅致光，又話普通黨員做嘢使乜向佢哋交代？似乎唔介意黨友過對家「秘撈」喎。白鴿黨正值存亡之秋，羅致光唔幫黨友培訓都算，仲幫對家一把，唔通佢都睇死白鴿黨冇得救？我哋打過電話畀羅致光，可惜搵佢唔到。
阿基斥工記誣衊拉布
一直盛傳工記全力進攻九龍西，新上任工記副會長嘅周聯僑就乘機鬧爆部分泛民就預算案「拉布」，延誤基建工程撥款。周聯僑揚言會動員落地盤，號召逾三十六萬工友、業界登記做選民，用選票踢走「拉布」議員，「你拉布，我哋就拉票！」
坊間有傳紮根深水埗多年嘅民協立法會議員馮檢基（阿基）重返九龍西參選，以重奪失去嘅九龍西議席。唔知係咪選情受威脅，阿基尋日急急發聲明，批評工記嘅宣傳單張誣衊佢有份「拉布」，奉勸工記班後起之秀唔好玩弄政治手段，抹黑其他黨派喎。