中環出更：趙麗娟叫姊妹買磚防老
置業係唔少情侶嘅夢想，不過就算孤單一人，都要諗吓買樓傍身。單身嘅香港會計師公會前會長趙麗娟（Susanna）教後生女趁早投資買樓，即使將來搵唔到另一半結婚，都有層樓揸手，就毋須靠男人喎。咁講法，咪即係叫啲後生女買定「姑婆屋」？
城市女青年商會尋日舉行新一屆「全港時尚專業女性選舉」，多位歷屆得獎者齊現身壯聲勢。為比賽擔任首席評審嘅Susanna趁機分享安身之道，教姊妹最緊要分散投資。以佢為例，除咗買藍籌股收息，亦趁早買「磚頭」，如今手揸幾多層樓就唔講嘞，但佢苦口婆心勸單身女人買樓：「如果一個人買唔起，可以考慮同幾個好姊妹夾份買，賺到第一桶金後，自然有第二、第三層樓。」
古時中國人一早話買定「姑婆屋」防老，睇黎Susanna深明此道喎。佢又話，嫌香港樓太貴的話，內地物業都係唔錯選擇，買嚟收租，不知幾爽。
不過，時下樓價高企，想做業主，瞓身打工都唔掂，可能因為生活壓力大，多咗女士吸煙。有份主禮嘅食物及衞生局副局長陳肇始（Sophia）話，女性煙民近年有上升趨勢，部分人係因為情緒問題或心情欠佳，呢個現象令佢好擔心，奉勸姊妹們為健康着想，盡快戒煙。至於Sophia自己就鍾意行街Shopping減壓，健康好多。
「蜘蛛女」想生夠半打仔女
同場嘅「蜘蛛女」鄭麗莎都話對吸煙好反感，提議姊妹們多做運動，身心自然健康。而佢就享受湊仔樂，兒子眨眼半歲大，佢又心思思想再做媽咪，夢想係一口氣生夠六個喎。
卓妮