熟食市場空養蚊 食環官僚敗家仔

係咁嘅，食環署轄下有七十五個公眾熟食市場，包括十一個熟食小販市場，二十五個熟食市場，三十九個熟食中心。兩年前《好報》獨家踢爆熟食市場十室九空，大量糟蹋寶貴土地資源，審計署跟進調查，證實報道準確，冇花冇假。審計署報告係咁講嘅，熟食小販市場平均空置率超過六成，一百四十四個丟空檔位中近八成養蚊超過十年，最嚴重嘅長達二十九年，問你服未。至於熟食市場方面，九個設於臨時用地長達三十至四十二年，其中面積最大嘅長沙灣熟食市場空置率超過一半，○一年食環署聲言會將地皮交回政府，點知講完就算，不了了之。

除咗浪費土地資源，熟食市場嘅管理一樣烏煙瘴氣，部分檔位連防火間隔都冇，部分喺擠迫環境下存放大量電器同石油氣罐，萬一爆大鑊，隨時一鑊熟。仲有吖，二十五個熟食市場之中，居然冇一個符合供電標準，隨時引致火警，可謂危機四伏。審計署又發現部分檔位無牌出售酒類飲品或者違例從事食物製造工作，但係食環署隻眼開隻眼閉，並無採取行動處理，一句講晒，即係敷衍塞責。

政府部門出名鍾意耍太極，食環署仲離譜，直頭大覺瞓，轄下熟食市場一塌糊塗，唔係丟空養蚊，就係管理不善，你話佢哋返工究竟做乜。最離譜嘅係，絕大部分檔位空置數以十年計，流失嘅租金收入為數不菲，等於將公帑倒落鹹水海，唔怪得年年虧損喇。雖然話港府窮到只剩下錢，淨係民航處買錯廢柴空管系統都浪費十五億元，之不過咁喎，熟食市場十室九空唔只係浪費公帑，更加係浪費土地資源，家陣房屋問題嚴重，無殼蝸牛一屋難求，港府一方面呻無地建屋，一方面任由大量土地長年丟空，對唔對得住市民吖！

話時話，食環署糟蹋土地資源，早就見怪不怪咯。呢，公眾街市空置率一樣長期高企，搞到年年蝕錢，要納稅人倒貼。○三年審計署已經揭發問題，要求改善，點知食環官僚意見接受，態度照舊，○八年又被審計署炮轟。唔經唔覺，又過咗七年嘞，食環署幾時至肯改善呢？

計功夫茶話齋，港府不如將長期丟空嘅熟食市場同公眾街市收回，改為建屋安民，同時留番一個做紀念，作為食環官僚敗家嘅歷史見證！