政情：區璟智跳街舞撐青年工作
財經事務及庫務局前常秘「頭箍小姐」區璟智去年底退休後，就瞓身投入青年事務工作，仲做埋協青社執行委員會會長。日前佢就以呢個新嘅身份出席喺沙田大會堂露天廣場舉行嘅「協青狂舞派對」，與一班主禮嘉賓帶領過千名市民跳街舞，身體力行支持年輕人，話畀大家知跳街舞都可以係有出色嘅。
助後生仔啟發潛能
區璟智形容，年輕人喺香港接受「one size」（均碼）嘅傳統教育，就好似着一件「one size」嘅衣服咁，唔一定個個都啱着，部分年輕人喺呢個制度下發揮唔到個人長處，亦唔代表佢哋一無是處，好可能佢哋只係需要一啲較另類嘅培訓，啟發潛能。
大約喺三、四年前，區璟智在朋友介紹下第一次接觸到協青社，當時朋友好希望佢加入幫手，眼見一啲原本讀唔成書嘅街頭青年可以從打拳、攀石及街舞等，逐漸建立個人自信心並重返正途，覺得好有意義。佢仲勉勵時下年輕人，唔同年代都會有唔同問題要面對，唔好輕言放棄自己。