每逢大時大節，十八區都會懸掛燈飾增添氣氛，沙田節日燈飾統籌委員會去年就申請咗二百萬元公帑，喺城門河兩岸懸掛燈飾，點知今年二月十八至十九日，即農曆年三十晚同年初一就冇開啟，搞到烏燈黑火。
有沙田街坊話，今年農曆年初二沙田鄉事委員會副主席李志麒喺車公廟為沙田求得第三十二號下籤，最後兩句籤文就係「無端一陣狂風雨，萬家燈熄斷管絃」，估唔到車公真係咁靈喎。
沙田區議員丘文俊早前就收到沙田街坊投訴，話瀝源橋兩岸燈飾喺年三十晚同大年初一都冇開到，加上中咗籤文預示，覺得極唔吉利、有不祥之感。佢於是就「燈熄」一事向政府查詢，問當局點樣紓緩居民嘅不安情緒。
沙田民政事務處日前就回覆話，燈飾承辦商職員喺二月十八日晚（年三十晚）已經發現部分地點電掣發生故障，令燈飾開唔到，雖然翌日（大年初一）已派人維修，點知因天雨關係再度故障，承辦商擔心職員安全，所以到二月二十日（年初二）先再維修。不過，丘文俊就質疑如果唔係街坊投訴，籌委會都唔會知燈飾故障一事，鬧爆失職兼浪費公帑。