政情：減輕選失 泛民默許剪布
立法會尋日繼續審議財政預算案撥款，包括社民連梁國雄（長毛）在內嘅激進泛民主派議員一早揚言會「拉布」，早前更提出三千多項修正案，主席曾鈺成周一就手起「剪」落將修正案剪剩六百多項，而秘書處亦將所有修正案合併成二百多項辯論，以免影響議會運作。最奇怪係，今次泛民聲都唔聲吓，竟然默許主席「剪布」，莫非連泛民都自覺「拉布」係「票房毒藥」，擔心支持「拉布」會影響年底區議會選情？
與建制派輪更防流會
過去曾鈺成「剪布」嘅時候，泛民議員例必譴責，甚至有議員提出司法覆核，點解今次「剪布」成班泛民都無聲無氣呢？據了解，泛民尋日開緊急飯盒會都有討論主席「剪布」一事，而佢哋嘅回應竟然係：「知悉主席安排，不評論」，等於變相默許主席「剪布」。其實早在周一，我哋已經發現身為飯盒會主席嘅梁家傑，喺曾鈺成宣布要「剪布」嘅時候古古怪怪，問佢泛民有咩行動又話「要傾吓先」。
其實「拉布」玩足幾年，已經浪費唔少公帑及議會時間，令市民大感不滿，正如財政司司長曾俊華批評「拉布已成票房毒藥」。泛民今次不單止唔再參與及縱容「拉布」，更加同建制派協議輪更以免因有人「拉布」及法定人數不足而流會，莫非泛民終於覺悟？據知係因為區議會選舉將喺年底舉行，泛民唔少議員都怕繼續「拉布」會乞人憎，要喺選舉負上代價，所以紛紛同「拉布」劃清界線，對主席「剪布」更加隻眼開隻眼閉。
雖然「拉布」無咗溫和泛民支持，但幾位「拉布」議員依然拉得不亦樂乎，佢哋尋日就十二次要求點算開會法定人數，一朝早就已經浪費咗兩個幾鐘開會時間，納稅人嘅血汗錢就咁倒落鹹水海。依家連溫和泛民都覺悟唔敢再支持「拉布」，唔知激進泛民議員幾時先肯收手呢？