中環出更：荃灣區會主席 未嘗荃灣宿一宵
荃灣區議會主席陳耀星十三年前做仁濟醫院主席時，已經喺荃灣區服務及工作，可以話係睇住荃灣環境改變。儘管佢對該區大小事務瞭如指掌，仲不時捐窿捐罅搵嘢食，當正荃灣係另一個家，但佢笑言從來未喺荃灣瞓過一晚喎，每日做完嘢就返回九龍塘住所，就係咁，眨眼已十幾年。
話唔轉戰直選
講到年底區議會選舉後會取消委任制，本來屬委任區議員嘅陳耀星就話唔會轉戰直選，皆因佢年紀都有番咁上吓，係時候退落嚟畀多啲機會其他年輕人參與，仲講笑話年紀大冇咁好體力四圍拉票，所以疊埋心水退休歎世界。佢透露，年底退休後會先同家人去旅行，地點到時玩即興，又笑笑口話終於可以擺番多啲時間喺佢嘅跑馬興趣上。
不過，陳耀星話喺荃灣咁多年，同街坊已經變得好熟落，始終好有親切感，所以退休後可能會間中返去行吓。問佢會唔會想兒子陳湛全嘗試從政，佢就坦言冇諗過喇，既然啲仔冇興趣就唔會強迫佢哋，等佢哋做番自己鍾意嘅嘢仲好喎。
卓妮