荷里活電影《捉智雙雄》裏面，主角扮醫生逃避追捕，成功瞞天過海。估唔到呢一幕竟然喺香港公立醫院重演，情節仲離奇過電影，唔到你唔服。
話說有一名在澳洲讀醫不成回港嘅富二代港男，由三月下旬開始，至少十次扮醫生潛入聯合醫院，居然一直都冇人發覺。呢位假醫生趁住凌晨時分院方保安意識鬆懈，一時話唔記得帶職員證，一時以其他醫生嘅名，成功瞞過保安取得臨時職員證進入病房。由於佢着住件白袍，似模似樣，病人不虞有詐，病歷任睇唔嬲。最離譜嘅係，對於有人假扮醫生，院方一直懵然不知，直至前日至有保安如夢初醒，報警拉人，並向私隱專員公署匯報事件。
咁都得？即使係普通公司，都唔係求其講個名就可以自出自入，何況係醫院重地，點可以好似冇掩雞籠o架。最得人驚嘅係，涉事嘅其中一個病房係兒童病房，萬一假醫生圖謀不軌，後果不堪設想。唔怪得事件發生後，一片嘩然，市民直斥醫院保安兒戲。
咁都未算吖，有病人家屬聲稱冇見過假醫生，但就見過假冒物理治療師。即係話，公立醫院可能唔只有假醫生咁簡單，到底仲有幾多類似事件未被揭發，當局要徹查同交代咯。
話時話，公立醫院管理混亂，烏龍百出，大家早就見怪不怪咯。呢，早前有個未足一歲嘅嬰兒跌傷入院，嬰兒母親誤會有人要搶走佢嘅骨肉，於是趁醫護唔為意抱走BB，整個過程不足十分鐘，揭露醫院保安漏洞多多。正如有人話齋，公立醫院中門大開，完全不設防，莫講話假醫生及假物理治療師自出自入，冒充病人家屬招搖撞騙都得吖。
講開公院保安漏洞，真係一匹布咁長。有醫院將病人姓名及身份證號碼等隨意放喺櫃位，有醫院甚至將病人資料當廢紙循環再用，至於遺失病人資料事件更加係無日無之。當然喇，醫療事故層出不窮，打錯針、斷錯症、輸錯血、派錯藥、開錯刀，五花八門，無奇不有，呢啲保安漏洞可能只係小兒科啫。有人形容公立醫院危機四伏，真係一啲都冇誇張！
講到呢度，功夫茶真係有啲懷疑，公共醫療系統烏煙瘴氣，亂象叢生，十足十無王管咁，莫非嗰班高薪厚祿嘅醫療官僚都係假冒嘅？