市區重建局行政總監譚小瑩早前突然辭職，仲表明係因為同市建局主席蘇慶和對市建局嘅理念有根本分歧，事件引起連串風波。尋日蘇慶和首次主動見傳媒，佢冇直接回應係咪提出將收購部門外判，但就承認曾與業務以舊樓重建為主嘅田生集團食過飯，強調與業界接觸好正常。對於被指市建局向錢看及譚小瑩辭職引起嘅風波，蘇慶和話清者自清，仲話其他噪音唔會影響到佢喎！
