政情：膽痛復發 長毛呻焗睇私院
年近六十歲嘅立法會議員梁國雄（長毛）近年成日出入醫院，去年十一月先至因急性膽痛而叫救護車入院。尋日佢出席財委會審議政府申請四十億三千萬元免息貸款，畀中文大學發展非牟利私家教學醫院時，自爆上星期又出現膽痛，原本想去公立嘅瑪麗醫院做檢查，但輪候時間太長，焗住今日要去私家嘅寶血醫院做電腦掃描檢查喎！
長毛講到嬲爆爆，佢話：「我差唔多死啦，先可以去瑪麗醫院，如果唔係就要畀兩萬，或者一萬五千蚊。」佢仲怒斥如果一定要喺政府醫院做檢查，咁就呢一世都唔使做喇，所以就算私家醫院收費貴，佢都冇得揀。